مين احنا
حلم صغير بلّش من بسطة فيها كم كِتاب بوسط البلد!
وعلى مدار خمس سنين، كانت هالبسطة بتكبر، وبكبر معها الحلم،
طيب شو كانت أهدافنا؟ هدفنا كان نعمل مكان يصير بيت ومقصَد لكُل قارئ.
متى بلشنا ؟
وفي شهر ٧/٢٠٢٣ كان تحقيق الحُلم
فتحنا بوك شوب وكوفي هاوس سُكون
وهون قدرنا نجسّد شعارنا الي دايمًا كنّا ماشيين فيه
"سُكون لكل قارئ"
شو سكون
مكان بتقدر تقرأ فيه وتعيش جوّا قصة كتابك بكُل هدوء ورواق،
ولإنه المكان هادي، استغلينا شويّة مساحة وعملنا فيها قسم خاص للدراسة.
شو بتقدموا؟
وأكيد عارفين إنه القهوة وقود القرّاء
فجهزّنا قسم كامل لتحضير القهوة العربية والغربية، وكثير مشروبات متأكدين إنكم راح تحبّوها
طب و دائرة سُكون؟
هي مساحة بتشارك فيها آراءك من خلال جلسات مناقشة الكُتب الي بنعملها كل يوم سبت
وكمان بتقدر تتثقّف فيها نفسيًا وتحِب مجال علم النفس بعد كُل جلسة نفسية بنعملها يوم الأربعاء
مافي العاب؟
ومين قال هالدائرة بتقتصر على المناقشة والثقافة النفسية؟ لا بنلعب فيها كمان
كل نهاية ووسط اسبوع بنلعب لعبة مافيا وبنكتشف الجانب الي بتعرف تمثّل فيه بشخصيتك
زورونا لتكونوا جزء من هاي العيلة، وتعيشوا حلم سُكون معنا.
عمان - وسط البلد - شارع الذهب - بعد بكداش بخمسين متر عاليمين- من داخل الكراج الطابق الاول.
